Komisionerja për Mbrojtjen nga Diskriminimi, znj. Genta Tafa (Bungo), mori pjesë në konferencën kombëtare “Barazia para ligjit dhe aksesi në drejtësi për personat me aftësi të kufizuara në Shqipëri: Nga garancitë ligjore te zbatimi në praktikë”.
Konferenca u organizua nga Fondacioni Shqiptar për të Drejtat e Personave me Aftësi të Kufizuara (FSHDPAK), në bashkëpunim me Doën Syndrome Albania dhe ANAD-SHKSHNJND, me pjesëmarrjen e përfaqësuesve të institucioneve publike, sistemit të drejtësisë dhe organizatave të shoqërisë civile.
Në këtë konferencë kombëtare, Komisionerja znj. Genta Tafa (Bungo) mori pjesë në diskutimet mbi temën “Barazia para ligjit: Nga kapaciteti juridik te vendimmarrja e mbështetur”, ku në fokus të diskutimeve ishin zbatimi i nenit 12 të Konventës së OKB-së për të Drejtat e Personave me Aftësi të Kufizuara, njohja e barabartë e kapacitetit juridik, kalimi nga modelet e vendimmarrjes zëvendësuese drejt vendimmarrjes së mbështetur, si dhe reformat e nevojshme ligjore dhe institucionale.
Komisionerja vlerëson se garantimi i barazisë para ligjit dhe aksesit efektiv në drejtësi për personat me aftësi të kufizuara kërkon respektimin e të drejtës së çdo individi për të vendosur vetë për çështjet që lidhen me jetën e tij, si dhe eliminimin e barrierave diskriminuese. Në këtë kuadër, në prill të këtij viti, KMD ka rekomanduar rishikimin e kuadrit ligjor në përputhje me standardet ndërkombëtare dhe mbetet i angazhuar për të ndjekur zbatimin e rekomandimeve, për të kontribuar në përmirësimin e legjislacionit dhe për të shqyrtuar rastet e pretenduara të diskriminimit, përfshirë mohimin e së drejtës për të vendosur vetë apo të përshtatjes së arsyeshme.
Pjesëmarrja e Komisionerit për Mbrojtjen nga Diskriminimi në këtë konferencë vjen në kuadër të angazhimit institucional për mbrojtjen e personave me aftësi të kufizuara nga diskriminimi, garantimin e trajtimit të barabartë dhe promovimin e ushtrimit efektiv të të drejtave të tyre.
