Përfaqësues të Komisionerit për Mbrojtjen nga Diskriminimi morën pjesë në konferencën shkencore me temë “Aspekte të përndjekjes politike të ish-Sigurimit të Shtetit Shqiptar (1944–1991)”, organizuar nga Autoriteti për Informimin mbi Dokumentet e ish-Sigurimit të Shtetit (AIDSSH).
Konferenca solli në vëmendje rëndësinë e njohjes së së kaluarës, hapjes dhe përdorimit të dokumentacionit arkivor, trajtimit me përgjegjësi të pasojave të përndjekjes politike, si dhe forcimit të bashkëpunimit ndërinstitucional për mbrojtjen e të drejtave të njeriut dhe ruajtjen e kujtesës historike.
Në konferencë u theksua rëndësia e njohjes së së kaluarës, hapjes dhe përdorimit të dokumentacionit arkivor, trajtimit me përgjegjësi të pasojave të përndjekjes politike, si dhe bashkëpunimit ndërmjet institucioneve publike, akademisë dhe shoqërisë civile për ruajtjen e kujtesës historike dhe promovimin e vlerave demokratike.
Në konferencë morën pjesë përfaqësues të AIDSSH-së, akademikë, studiues, ekspertë dhe profesionistë të fushave të historisë, arkivistikës, drejtësisë tranzicionale, psikologjisë dhe shkencave sociale, duke e shndërruar aktivitetin në një forum të rëndësishëm reflektimi dhe dialogu mbi të kaluarën dhe sfidat e së ardhmes.
Në emër të Komisionerit për Mbrojtjen nga Diskriminimi, përfaqësuesit e institucionit theksuan gatishmërinë për të thelluar bashkëpunimin me AIDSSH, në funksion të ndërgjegjësimit institucional, mbrojtjes së dinjitetit njerëzor, parandalimit të diskriminimit dhe promovimit të një kulture të respektimit të të drejtave dhe lirive themelore.